കാല്ഗറി: ലോക കേരള സഭയിലേക്ക് കാനഡയില് നിന്നും ജോസഫ് ജോണ് കാല്ഗറി അഞ്ചാം പ്രാവശ്യവും തെരഞ്ഞെടുക്കപ്പെട്ടു. ലോക കേരള സഭയുടെ നോര്ത്ത് അമേരിക്ക മഹാ സമ്മേളനം 2023ല് ന്യൂയോര്ക്കില് നടന്നപ്പോള് പങ്കെടുത്തിരുന്ന വ്യക്തികളില് ഒരാളായിരുന്നു ജോസഫ് ജോണ്. സാമുദായിക സാംസ്കാരിക പ്രവര്ത്തനങ്ങളില് അദ്ദേഹം മുന്നിരയില് പ്രവര്ത്തിക്കുന്നു.
1980 മുതല് പോത്തനാട് ജയ് ഹിന്ദ് ആര്ട്സ് & സ്പോര്ട്സ് ക്ലബിലൂടെ തുടങ്ങിയ ആ പ്രവര്ത്തനം പന്നിവിഴ സന്തോഷ് വായനശാല, ശാസ്ത്ര സാഹിത്യ പരിഷത്ത് എന്നിവിടങ്ങളിലൂടെ നാടിന്റെ സാമൂഹിക - സാംസ്കാരിക മണ്ഡലങ്ങളില് ആഴത്തില് വേരോടി.
നിലവില് കാനഡയുടെ മലയാളം മിഷന് കോഓര്ഡിനേറ്ററായി പ്രവര്ത്തിക്കുന്ന അദ്ദേഹം, വിദേശമണ്ണിലും മലയാള ഭാഷയും സംസ്കാരവും സംരക്ഷിക്കുന്നതില് നിര്ണായക പങ്കുവഹിക്കുന്നു. 2009 - 2010 കാലഘട്ടത്തില് കാല്ഗറി മലയാളി കള്ച്ചറല് അസോസിയേഷന് പ്രസിഡന്റായി മികച്ച സേവനമനുഷ്ഠിച്ചു.